হেপাহৰ ভোগালী বিহুলৈ মাজত মাথো কেইটামান দিন । প্ৰতিবছৰৰ দৰে এইবেলিও প্ৰাইড ইষ্ট এণ্টাৰটেইনমেণ্ট প্ৰাইভেট লিমিটেডৰ উদ্যোগত গুৱাহাটীৰ দিঘলীপুখুৰীত আয়োজন কৰা হয় “ভোগালী মেলা ২০২২” । দেওঁবাৰে অসমৰ কৃষিমন্ত্ৰী অতুল বৰাই “ভোগালী মেলা ২০২২”ৰ শুভাৰম্ভ কৰে ।
উৎসৱৰ সৈতে জড়িত এই মেলাত থলুৱা ভিন্ন বিহু সুস্বাদু খাদ্য সামগ্ৰী আৰু পৰম্পৰাগত হস্তশিল্প প্ৰদৰ্শন কৰা হয় । উল্লেখ্য যে, ভোগালী মেলা ২০২২ য়ে ক্ৰেতা আৰু বিক্ৰেতা দুয়োকে ক্ৰয়-প্ৰদৰ্শন কৰিবলৈ আৰু আনকি এটা চালিৰ তলত পিঠা-পনা, লাৰুৰ দৰে বিহু সুস্বাদু খাদ্য বিক্ৰী কৰিবলৈ সুবিধা প্ৰদান কৰিছে । প্ৰাইড ইষ্ট এণ্টাৰটেইনমেণ্ট প্ৰাইভেট লিমিটেডৰ মহান উদ্যোগৰ বাবে কৃষি মন্ত্ৰী অতুল বৰাই প্ৰতিষ্ঠানটোৰ প্ৰতিগৰাকী কৰ্মকৰ্তাক অভিনন্দন জনায় ।
যুগ যুগ ধৰি চলি অহা পৰম্পৰাসমূহৰ সৈতে নতুন চামক জড়িত কৰাব পাৰিলেহে জাতিটো অধিক উজ্জীৱিত হ'ব । সেই দিশৰ পৰা এই মেলা বিশেষ গুৰুত্বপূৰ্ণ । কৃষিমন্ত্ৰী অতুল বৰাই কয় যে- “উত্তৰ-পূবৰ অগ্ৰণী সংবাদ গোষ্ঠী প্ৰাইড ইষ্ট এন্টাৰটেইনমেন্ট প্ৰাইভেট লিমিটেডৰ দ্বাৰা গুৱাহাটীৰ দীঘলীপুখুৰীত আয়োজিত ভোগালী মেলা-২০২২ আজি উদ্বোধন কৰি আহ্লাদিত হ'লোঁ । লগতে থলুৱা ভিন্ন খাদ্য সামগ্ৰী, বস্ত্ৰ, ৰন্ধন প্ৰণালীৰ বিপণীসমূহ দৰ্শন কৰি আপ্লুত হওঁ” ।
ক’ভিড বিধি মানি আয়োজন কৰা এই অনুষ্ঠানক কিষান মৰ্চাৰ সহযোগিতাৰো মন্ত্ৰীগৰাকীয়ে শলাগ লয় । এই পদক্ষেপে মহানগৰীখনত বাস কৰা কেৱল অসমীয়া ভাষীকেই নহয়, বিভিন্ন ভাষা-ভাষী, ধৰ্মাৱলম্বী, জাতি-জনগোষ্ঠীৰ লোকসকলক আকৰ্ষিত কৰাৰ লগতে অসমৰ সাতাম পুৰুষীয়া সমন্বয়ৰ এনাজৰীডাল অধিক মজবুত কৰিব বুলি তেওঁ উল্লেখ কৰে ।
প্ৰাইড ইষ্ট এণ্টাৰটেইনমেণ্ট প্ৰাইভেট লিমিটেডৰ চি.এম.ডি ৰিনিকি ভূঞা শৰ্মাই অসমৰ কৃষি মন্ত্ৰী অতুল বৰাৰ সৈতে মেলাখন পৰিদৰ্শন কৰাৰ লগতে ভোগালী মেলাৰ পৰম্পৰাগত বিভিন্ন সুস্বাদু ব্যঞ্জনৰ জুতি লয় । উল্লেখ্য যে, ভোগালী মেলাত কৃষি মন্ত্ৰী অতুল বৰাই পৰম্পৰাগত বিহু গীত গাই দৰ্শক সকলক আপ্লুত কৰে ।
লগতে পঢ়কঃ Milk Production: ৰাষ্ট্ৰীয় দুগ্ধ উন্নয়ন পৰিষদৰ সৈতে ২০০০ কোটিৰ বুজাবুজি চুক্তি