বর্তমান সময়ত বতা চৰাইৰ ফার্ম বহুতো লোকে কৰা দেখা গৈছে। আৰু লাভান্বিতও হৈছে ৷ সেয়েহে নিৱনুৱা যুৱক যুৱতী কেবল মাত্র চৰকাৰী চাকৰি আশা নকৰি স্বাৱলম্বী হোৱাৰ পথ সৃষ্টি হৈছে ৷ বতা চৰাই পালন কৰি বছৰেকত এটা ভাল অংকৰ পইচা উপাৰ্জন কৰিব পাৰি ৷
তলত বতা চৰাই আৰু ইয়াৰ ব্যৱসায় ভিত্তিত কেনেকৈ কৰিব পাৰি আলোচনা কৰা হল -
বতা চৰাই বৰ সৰু। ই ওখ প্ৰায় ১০-১৭ ছেন্টিমিটাৰ। ইয়াৰ সামান্য পৰিমাণত মাংস আৰু উজ্জ্বল সৰু কণীৰ কাৰণে পৃথিৱীৰ বিভিন্ন ঠাইত বতা চৰাই পালন কৰা হয়। দুমাহ বয়স হোৱাৰ পিছৰে পৰাই ই কণী পাৰিবলৈ আৰম্ভ কৰে।
ধান, মাহ, সৰিয়হ, ফল-ফুল আদিৰ উপৰিও পোক-পৰুৱা আদিৰ উপৰিও পোক-পৰুৱা আদিও ই ভক্ষণ কৰে।
বতা চৰাইৰ বৈজ্ঞানিক নাম- Coturnix Coturnix.
ওজন- ৭০-১৪০ গ্ৰাম
গাৰ ৰং- মুগা, ক’লা, বগা, নীলা।
মতা-মাইকীৰ চিন- বুকুত ৰেখা থাকিলে মাইকী। ৰেখা নাথাকিলে মতা। মতাৰ তুলনাত মাইকী ডাঙৰ।
ব্যৱসায় ভিত্তিত পালনৰ বাবে আৱশ্যকীয় সা-সৰঞ্জাম -
সজা :
৫ ফুট দীঘল, ৩ ফুট বহল, ১ ফুট সজা এটা জালেৰে বনাব লাগিব। এনেকুৱা একোটা সজাত ৫০টা বতা চৰাই ৰাখিব পাৰি। আৱশ্যক অনুসৰি কেবাটাও স্তৰ বনাব পাৰি।
যদি পোৱালি পাব খোজা হয়, তেনেহ’লে incubator যন্ত্ৰৰ প্ৰয়োজন। ইয়াৰ জৰিয়তে একেলগে বহুতো কণী জগাব পাৰি। অৱশ্য মিনি incubatorও পোৱা যায়। incubator যোগান ধৰা প্ৰতিষ্ঠান হ’ল S.R. Incubators. Jayanagar, Guwahati.
আৰু পঢ়ক- আপোনাৰ কৃষিজাত উৎপাদিত সামগ্রীসমুহ ডিজিটেল মার্কেটিংৰ জৰিয়তে বিক্রী কৰি ব্যৱসায়খন বৃদ্ধি কৰিব পাৰে
খাদ্য:
চাউলৰ গুড়ি, মল, খলিহৈ, মাকৈৰ গুড়ি, চয়াবিনৰ গুড়ি, শামুকৰ গুড়ি ইত্যাদি।
কণীৰ উৎপাদন -
বতা চৰায়ে প্ৰথম বছৰত প্ৰায় ২৮০ টা কণী পাৰে। কিন্তু দ্বিতীয় বছৰৰ পৰা উৎপাদন কমি আহে। প্ৰায় ডেৰ বছৰ বয়স হ’লে ইয়াক মাংসৰ কাৰণে বিক্ৰী কৰি দিয়া ভাল।
বতা চৰাই সৰু যদিও এযোৰ পাৰ চৰাইৰ তুলনাত এযোৰ বতা চৰাইৰ পৰা অধিক মাংস পোৱা যায়। সৰু ল’ৰা-ছোৱালী, গৰ্ভৱতী মহিলা, ৰোগীৰ কাৰণেও ই পুষ্টিকৰ খাদ্য।
বতা চৰাইৰ কণীয়ে চকুৰ দৃষ্টিশক্তি বৃদ্ধিত সহায় কৰে। ৰক্তচাপ নিয়ন্ত্ৰণ কৰাৰ উপৰিও মধুমেহ ৰোগ প্ৰতিৰোধ কৰিব পাৰে। মুঠৰ ওপৰত আমি ইয়াকে ক’ব পাৰো যে শিশুৰ পৰা আৰম্ভ কৰি ৰোগী-নিৰোগী, বৃদ্ধ আদি সকলোৱেই বতা চৰাইৰ কণী খাব পাৰে।
উপকাৰিতা -
বতা চৰাইৰ মাংস আৰু কণী শিশুৰ খাদ্য আৰু ৰোগীৰ পথ্য বুলি ক’ব পাৰি। গৰ্ভৱতী মহিলাৰ কাৰণেও ই উপকাৰী। ১০ গ্ৰাম ৰন্ধা মাংসত:
কেল’ৰি- ২২৭
চৰ্বি: ১৪ গ্ৰাম
কাৰ্ব’হাইড্ৰেট- ০
প্ৰ’টিন- ২৫ গ্ৰাম থাকে।
বতা চৰাইৰ কণীৰ গুণাগুণ:
বজাৰত– সাধাৰণতে অন্ধ্ৰপ্ৰদেশৰ পৰা অহা ফাৰ্মৰ কণীৰ পয়োভৰেই বেছি। অলপ-অচৰপ থলুৱা কণী পোৱা যায় যদিও সেয়া একেবাৰে কম। বহুতেই হাঁহৰ কণী খাবলৈ নিবিচাৰে। তাৰোপৰি দুখৰ বিষয় যে বর্তমান প্লাষ্টিকৰ কণীও হেনো বজাৰত উপলব্ধ। সেয়েহে বতা চৰাইৰ কণী যিয়ে এবাৰ খাইছে, তেনে লোকে অন্য চৰাইৰ কণী খাবলৈ নিবিচৰে।
বতা চৰাই পালন কৰাৰ সুবিধা -
*ই যিহেতু সৰু চৰাই, সেয়েহে কম ঠাইতে ইয়াক পালন কৰিব পাৰি।
*কম মূলধনৰ প্ৰয়োজন।
*মহিলাসকলে সহজে ইয়াক পালন কৰি আত্মনিৰ্ভৰশীল হ’ব পাৰে।
*পাঁচ সপ্তাহত ই বিক্ৰীৰ কাৰণে উপযুক্ত হয়।
*কমদিনতে ই যৌৱনপ্ৰাপ্ত হয় আৰু ৬-৭ সপ্তাহত কণী পাৰিবলৈ আৰম্ভ কৰে।
*কণী সৰু যদিও কুকুৰা কণীৰ দৰে একে মূল্যমানৰ।
*খাদ্য তথা আনুষংগিক খৰচ কম কাৰণে অতি সামান্য মূলধনেৰে বতা চৰাইৰ ফাৰ্ম এখন খুলিব পাৰি।