বিদেশৰ পৰা বা বহিঃৰাজ্যৰ পৰাও খাদ্য - সামগ্ৰীৰ আমদানি এক স্বাভাৱিক প্ৰক্ৰিয়া। কিন্তু বহিঃৰাজ্যৰ ওপৰত অসম যে এতিয়া সম্পূৰ্ণৰূপে নিৰ্ভৰশীল নহয়। তাকে প্রমাণ কৰিছে উঠিপৰি লাগিছে একাংশ নৱপ্ৰজন্মৰ খেতিয়কে । এইসকল কৃষকৰ বাবেই অসমেও এতিয়া বহিঃৰাজ্যলৈ খাদ্য সামগ্ৰী প্ৰেৰণ কৰিবলৈ সক্ষম হৈছে । বিশেষকৈ জৈৱিক শস্য উৎপাদনেৰে বিগত সময়ছোৱাত ৰাজ্যখনে লাভ কৰা বিশেষ সফলতাৰ অংশস্বৰূপে শেহতীয়াকৈ বিদেশলৈ ৰপ্তানি হৈছে বিভিন্ন ফচল ।এই তালিকাত আছে ভোট জলকীয়া , নেমু , জহা চাউল , ক'লা চাউল , মুগা চাউল , আদা , ৰঙালাও , কঁঠাল , লিচু , হালধি , পাণ , বাচমতি চাউল ইত্যাদি ।
অসমৰ এই উৎপাদিত সামগ্ৰীয়ে ইতিমধ্যে ভূটান , মধ্যপ্রাচ্য , লণ্ডন আৰু ইউৰোপৰ বজাৰতো স্থান লাভ কৰিবলৈ সক্ষম হৈছে । এই ধাৰা অব্যাহত ৰাখি শেহতীয়াকৈ অসমৰ জৈৱিক শস্যই এতিয়া স্থান লাভ কৰিবলৈ লৈছে উত্তৰ ভাৰত আৰু দক্ষিণ ভাৰতত ৷ ৰাজ্যখনৰ জৈৱিক শস্যৰ চাহিদা ক্ৰমাৎ বৃদ্ধি হ'বলৈ ধৰিছে বহিঃৰাজ্যত । শেহতীয়াকৈ বহিঃৰাজ্যলৈ ৰপ্তানি হ'ল অসমৰ জহা চাউল , ৰঙা চাউল , আনাৰস আৰু নেমু টেঙা । চলিত বৰ্ষটোতে কামাখ্যাৰ ৰে'ল ষ্টেচনৰ পৰাই দিল্লীলৈ প্ৰেৰণ কৰা হ'ল অসমৰ ২৫ মেট্রিকটনতকৈ অধিক খাদ্যশস্য ।
এই জৈৱিক ফচলসমূহ কামাখ্যা ৰে'ল ষ্টেচনৰ পৰা নৰ্থ - ইষ্ট এক্সপ্রেছেৰে দিল্লীৰ বজাৰলৈ প্ৰেৰণ কৰা হৈছে । পৰৱৰ্তী সময়ত দিল্লীৰ পৰাই চুবুৰীয়া আন আন ৰাজ্যলৈ এই উৎপাদিত সামগ্ৰীসমূহ প্ৰেৰণ কৰা হ'ব ৷ মন কৰিবলগীয়া যে শেহতীয়াকৈ বাক্সা জিলাৰ নীলাচল কৃষি উৎপাদক কোম্পানীৰ জৰিয়তে যুক্তৰাষ্ট্ৰলৈ ৰপ্তানি কৰা হৈছিল ৬০০ কিলোগ্রাম নেমু । তেনেদৰে লণ্ডনলৈও প্ৰেৰণ কৰা হৈছিল অসমৰ নেমু । কাৰ্বি আংলঙৰ আদা আৰু আনাৰস ইতিমধ্যে ডুবাই আৰু লণ্ডনলৈ ৰপ্তানি কৰা হৈছে ।
কৃষি আৰু সংসাধিত খাদ্য সামগ্ৰী ৰপ্তানি বিকাশ কর্তৃপক্ষ ( এ পি ই ডি এ ) ই প্ৰকাশ কৰা মতে বিদেশৰ লগতে দিল্লী , জয়পুৰ , চণ্ডীগড় , লক্ষ্ণৌ , বাংগালুৰু , ইন্দোৰ আদি চহৰত শেহতীয়াকৈ অসমৰ জৈৱিক উৎপাদন নেমু , আনাৰস আৰু জহা চাউলৰ চাহিদা অভাৱনীয় হাৰত বৃদ্ধি পাইছে ৷ ৰাজ্যৰ একাংশ নৱপ্ৰজন্মৰ খেতিয়কে জৈৱিক উৎপাদনৰ ক্ষেত্ৰত বিশেষ আগ্রহ দেখুওৱাৰ বাবে বিগত সময়ছোৱাত এনেধৰণৰ খাদ্য - সামগ্ৰী উৎপাদনৰ ক্ষেত্ৰতো সফলতা লাভ কৰিছে অসমে । বিশেষকৈ কাৰ্বি আংলং , বাক্সা , মাজুলী আৰু লখিমপুৰ জিলাৰ কেইবাটাও কৃষক গোটে জৈৱিক উৎপাদনৰ ক্ষেত্ৰত সফলতা লাভ কৰাই নহয় , বহিঃৰাজ্যলৈ খাদ্য - সামগ্ৰী ৰপ্তানিৰ দ্বাৰা আর্থিকভাৱে যথেষ্ট লাভালাভ হৈছে ।
লগতে পঢ়ক- মহিলাসকলে ঘৰতে বতা চৰাই পুহি কিদৰে আত্মনিৰ্ভৰশীল হ’ব!