উশাহ লওঁতে কষ্ট? হ’ব পাৰে এই ৰোগৰ লক্ষণ

ব্যস্ততাৰে ভৰা জীৱনত আমি স্বাস্থ্যৰ চিন্তা কৰিবলৈ প্ৰায়ে পাহৰি যাওঁ। শিশুৰপৰা বৃদ্ধলৈ কামৰ হেঁচাই জুৰুলা কৰি ৰখা পৰিৱেশত স্বাস্থ্যক মানুহে গৌণ জ্ঞান কৰিবলৈ লৈছে। সময়ত খোৱা, সময়ত শোৱা এইবোৰ যেন সম্ভৱেই নহয় কাৰো বাবে! কিন্তু মানুহৰ ব্যস্ততাৰ সুবিধা লৈ গুৰুতৰ ৰোগে কেতিয়া শৰীৰত বাহ লয় সেয়া গমেই পোৱা নাযায়। ক’ভিড বিয়পি পৰাৰ পাছত স্বাস্থ্যজনিত সমস্যাবোৰ আৰু গুৰুতৰ হ’ল। ৰোগে বিচাৰ নকৰে শিশু কি বৃদ্ধ। মাথোঁ নিৰ্বিচাৰে সন্তৰ্পণে থিতাপি লয় দেহত। মাজুলীৰ ১৪ বছৰীয়া কণমানি শিল্পী তেজস্বিতা বৰুৱাৰ অকাল মৃত্যুৱে জোঁকাৰি গ’ল সকলোকে।

উৎসৱৰ মাজতে সকলোৰে বুকু বিদাৰি গ’ল অবাঞ্চিত খবৰটোৱে। তেজস্বিতাই কিয় ইমান কম বয়সতে মৃত্যুক সাবটিবলগীয়া হ’ল সেয়া এতিয়াও আমাৰ জানিবলৈ বাকী। কিন্তু এই ঘটনাৰপৰা আমি এটা শিক্ষা ল’ব নোৱাৰোঁনে? সততে আওকান কৰা স্বাস্থ্যজনিত বিষয়বোৰ আমি গুৰুত্বসহকাৰে ল’ব নোৱাৰোনে?

উশাহ লওঁতে কষ্ট পোৱাটো গুৰুতৰ অসুখৰ লক্ষণ হ’ব পাৰে। আপোনাৰ ক্ষেত্ৰতো যদি কেতিয়াবা এনে হৈছে তেন্তে শীঘ্ৰে চিকিৎসকৰ কাষ চাপক। প্ৰতি বছৰে লক্ষাধিক ৰোগ হাওঁফাওঁৰ ৰোগত আক্ৰান্ত হয়। কিন্তু ইয়াৰ অধিকসংখ্যকৰে ৰোগ ধৰা নপৰে।হাওঁফাওঁৰ ৰোগৰ লক্ষণসমূহ এনেধৰণৰ হ’ব পাৰেঃ

কাহঃ

কাহ হাওঁফাওঁৰ ৰোগৰ অন্যতম লক্ষণ। দীৰ্ঘদিন ধৰি কাহ হৈ থাকিলে চিকিৎসকৰ কাষ চাপক। কাহৰ লগত যদি তেজ যোৱা দেখিছে তেন্তে অলপো পলম নকৰি পৰামৰ্শ লওক চিকিৎসকৰ।

ডিছপেনিয়াঃ

কোনো ৰোগৰ বাবে উশাহ চুটি হোৱাটোক ডিছপেনিয়া বোলা হয়। হৃদৰোগ, হাওঁফাওঁৰ ৰোগ আদিৰ ক্ষেত্ৰত উশাহ চুটি হোৱা দেখা যায়। এনে লক্ষণ দেখিলে চিকিৎসকৰ কাষ চাপক।

উশাহ লওঁতে শব্দঃ

উশাহ লওঁতে শব্দ হোৱা কাৰ্যক হুইজিং বোলা হয়। উশাহ লওঁতে বা নিশাহ এৰোঁতে বেছিকৈ শব্দ হ’লে ই হুইজিঙৰ লক্ষণ হ’ব পাৰে। শ্বাস নলীত অস্বাভাৱিক কোষৰ সৃষ্টি হোৱা, প্ৰদাহ হোৱা, অত্যাধিক খেকাৰ ওলোৱা, আৰু উশাহত বাহিৰা বস্তু শ্বাস নলীত সোমাই ইয়াৰ পথ সৰু কৰি পেলোৱাৰ বাবে এনে হ’ব পাৰে। এনে হুইজিং মৰাত্মক ৰোগৰ লক্ষণ হ’ব পাৰে।

বুকুৰ বিষ:  বুকুৰ বিষ কেতিয়াবা সাধাৰণ কাৰণত হয়, কেতিয়াবা ই গুৰুতৰ ৰোগৰ লক্ষণ হ’ব পাৰে। প্ৰায়ে যদি আপোনাৰ এনে হয়, তেন্তে অকণো পলম নকৰাকৈ চিকিৎসকৰ কাষ চাপক।

হেম’টাইটিছঃ কাহৰ লগত তেজ গ’লে ই হেম’টাইটিছ ৰোগৰ লক্ষণ হ’ব পাৰে। কেতিয়াও ইয়াংক অৱজ্ঞা নকৰিব।

উখহা ৰোগঃ

হাত-ভৰি উখহি উঠাটো হাওঁফাওঁৰ ৰোগৰ লক্ষণ হ’ব পাৰে। হৃদৰোগৰ ক্ষেত্ৰতো এই লক্ষণে দেখা দিয়ে।

উশাহ বন্ধ হোৱা

উশাহ বন্ধ হোৱা তীব্ৰ আৰু দীৰ্ঘস্থায়ী উশাহ বন্ধ হোৱাটো হাওঁফাওঁৰ ৰোগৰ অতি গুৰুতৰ লক্ষণ। অতিপাত সংক্ৰমণ, হাওঁফাওঁৰ প্ৰদাহ, হূদস্পন্দন বন্ধ হোৱা আৰু গুৰুতৰ হাওঁফাওঁৰ ৰোগৰ বাবে তীব্ৰভাৱে উশাহ বন্ধ হব পাৰে।

হাওঁফাওঁৰ ৰোগ যে কেৱল বয়ষ্ক লোক ক্ষেত্ৰতহে হয় তেনে নহয়, কম বয়সীয়া ল’ৰা-ছোৱালীও এনে ৰোগত আক্ৰান্ত হ’ব পাৰে।

লগতে পঢ়কঃ স্বাস্থ্যৰ বাবে আটাইতকৈ উপযোগী ফল- আপেল নে কল?