ধেমাজি জিলাৰ জোনাইৰ মধন দিকাৰী গাঁও পঞ্চায়ত অন্তৰ্গত বৰদণ্ডি অঞ্চলত বৃহৎ কৃষি ভূমি এতিয়া খেৰনিলৈ পৰিৱৰ্তন হৈছে। বৃহৎ কৃষি ভূমিত অচিন পোকে চলাইছে ত্ৰাস ৷ যাৰ ফলত হাহাকাৰ লাগিছে কৃষকসকলৰ মাজত ৷ উপায়হীন হৈ ধাননি পথাৰত পশুধন মেলি দিছে কৃষকে ৷
কিন্তু দুৰ্ভাগ্যৰ কথা যে জিলাখনৰ কৃষিবিভাগত এইক্ষেত্ৰত কৃষকসকলক ধেমাজি জিলা কৃষি বিভাগ কোনো সহযোগিতা নকৰাৰ অভিযোগ উত্থাপিত হৈছে । বৃহত্তৰ জোনাইৰ কেইবাখনো গাঁৱৰ কৃষকৰ ভৰসাস্বৰূপ একমাত্ৰ পথাৰখন নষ্ট হোৱাৰ পিছতো কৃষকৰ সমস্যাৰ প্ৰতি জিলা কৃষি বিভাগে তিলমানো গুৰুত্ব প্ৰদান কৰা নাই বুলি কৃষকসকলে অভিযোগ উত্থাপন কৰিছে । আনকি কৃষি বিভাগে কোনো ধৰণৰ কীটনাশক ঔষধ যোগান নধৰা আৰু ক্ষতিগ্ৰস্ত কৃষকৰ কাষলৈ নহাৰো অভিযোগ উত্থাপিত হৈছে।
এনেদৰে এতিয়া ভাদ মাহৰ খেতিডৰা পোকৰ উপদ্ৰৱত সেউজীয়া হোৱাৰ বিপৰীতে হালধীয়া হৈ পৰিছে । এনেস্থলত খেতিয়কসকলে মূৰত হাত দি বহি থকাৰ বাহিৰে উপায় নোহোৱা হৈছে ।
যাৰবাবে এতিয়া ধাননি পথাৰত উপায়ন্ত হৈ কৃষকে গৰু মেলি দিবলৈ বাধ্য হৈছে। বান আৰু খৰাঙকো প্ৰত্যাহ্বান জনাই কৰা খেতিডৰা কৃষকসকলে অচিন পোকৰ ওচৰত হাত দাঙিবলৈ বাধ্য হ’ল।
লগতে পঢ়ক- মন্ত্ৰী ৰঞ্জিত কুমাৰ দাসে ঘৰৰ শাকনিবাৰীত ছিঙিলেই লাই-মূলা
Share your comments