হাঁহ পালনৰ বাবে জানিবলগীয়া আৱশ্যকীয় কথাঃ

অসমৰ প্ৰাকৃতিক পৰিবেশ হাঁহ পোহাৰ সুচল ঠাই। এনে কেতবোৰ ঠাই আছে য’ত বাৰমাহে পানী থাকে। সেইবোৰ ঠাইত হাঁহৰ খাদ্য সৰু সৰু মাছ,শামুক,কেঁচু কুমতি,পুনি স্বাভাবিকতে পোৱা হয়।তেনে ঠাইত হাঁহ সহজে পুহিব পাৰি। কোনো কোনো ঠাইত লেতা,পলু আদি পোৱা যায়। এইবোৰ হাঁহৰ উৎকৃষ্ট আহাৰ। ঘৰৰ পেলনীয়া শাক-পাচলি মাছ,ভাত,খুদ,চাউলৰ মল সিহঁতৰ খাদ্যৰ অন্যতম উপাদান। হাঁহৰ বেমাৰ আজাৰো কম হয়। প্ৰায় 3 বছৰলৈকে একেজাক হাঁহকে পুহিব পাৰি।

এইবোৰ সা-সুবিধা বিশেষকৈ গাঁও অঞ্চলত থাকে। এই সুচলৰ কাৰণে বহুতে হাঁহ পোহে।কিন্তু আমাৰ প্ৰতিজনী হাঁহে 50/60 টাৰ অধিক কণী নিদিয়ে।তাৰোপৰি কণী পৰাৰ পাছতেই উমনিত বহে।সেইকাৰণে এই জাতৰ হাঁহৰ উৎপাদনৰ কণীৰে বাঢ়ি অহা চাহিদা পুৰণ কৰিব নোৱাৰি।হাঁহৰে উন্নতি কৰি কণীৰ উৎপাদন বঢ়োৱাৰ উদ্দেশ্যে অসমলৈ “খাকী কেম্বেল” জাতৰ এজাক বিদেশী হাঁহ আমদানী কৰা হয়। এই হাঁহৰ বিশেষত্ব হ’ল বছৰেকত 250/300 কণী পাৰে,কণীৰ আকাৰ ডাঙৰ হয় আৰু উমনিত নবহে।

ইতিমধ্যে হাঁহ পালনৰ যোগেদি গাঁৱৰ ৰাইজ যে অৰ্থনৈতিক ভাবে উপকৃত হব পাৰে সেই কথাষাৰ খাকী কেম্বেল হাঁহ পালক সকলে ভালদৰে উপলব্ধি কৰিব পাৰিছে, অন্তত: যিসকল লোকে খাকী আৰু দেশী হাঁহ পুহিছে,তেখেত সকলে প্ৰথম বৰ্ণসংকৰ জাতৰ খাকী হাঁহে আমাৰ দেশী হাঁহতকৈ 5 বা 6 গুণ অধিক কণী উৎপাদন কৰে আৰু কণীৰ ওজনো তুলনামূলকভাবে 20-25 ভাগ বেছি। অন্য অৰ্থত কব পাৰে যে এজনী বৰ্ণসংকৰ খাকী হাঁহৰ উৎপাদন ক্ষমতা 5 বা 6 জনী দেশী হাঁহৰ সমান। আমি ইয়াকে কব পাৰো যে এক খৰছ একে আপদাল কৰি এজনী বৰ্ণসংকৰ জাতৰ খাকী হাঁহে আমাৰ দেশী হাঁহতকৈ 5 বা 6 গুণ বেচি কণী উৎপাদন কৰি হাঁহ পালকক সেই অনুপাতে অৰ্থনৈতিত উন্নতিত অৰিহনা যোগায়।