এটা অঞ্চল বা এটা জাতিৰ বিকাশত যেনেকৈ শিক্ষা, স্বাস্হ্য, বাণিজ্য, যাতায়তে গুৰুত্বপূৰ্ণ ভূমিকা পালন কৰে ঠিক তেনেকৈ কৃষি খণ্ডই বিকাশত বিশেষ অৰিহণা যোগায় । কৃষি অবিহনে এটা জাতি বা এখন দেশ ক্ষুধাৰ্ত হৈ থাকিব । ভূপেন হাজৰিকাই তাহানিতে গাইছিল খেতিয়কৰ নিস্তাৰ নাই, মাটি বিনে অসহায় ।
অসম এখন কৃষি প্ৰধান ৰাজ্য । চৰকাৰী তথ্য অনুসৰি বৰ্তমানে অসমৰ মুঠ জনসংখ্যাৰ ৫৮ শতাংশ লোক কৃষিৰ লগত জড়িত । আজি আমি আমাৰ আলোচনাত বৃহত্তৰ উত্তৰ পূৱ কামৰূপৰ কৃষি পৰ্যটন আৰু ইয়াৰ সম্ভাৱনা সম্পৰ্কে আলোচনা কৰিম । উত্তৰ পূৱ অঞ্চল বুলিলে সাধাৰণতে সামৰি লয় দলিবাৰী, পছৰীয়া, চাংচাৰি, বাইহাটা চাৰিআলি, শালমাৰা, বিহদিয়া ইত্যাদি অঞ্চল । এই অঞ্লটোৱে কৃষি পৰ্যটনৰ ক্ষেত্ৰত বৰ্তমান এক উল্লেখযোগ্য স্হান দখল কৰিছে ।
দলিবাৰী, পছৰীয়া অঞ্চলত বিভিন্ন ধৰণৰ শাক পাচলিৰ খেতি অসমৰ বিভিন্ন জিলালৈ পঠিওৱা হয় । লগতে তাত বহা দৈনিক শিঙিমাৰী বজাৰত এই শাক পাচলি বিক্ৰী কৰা হয় । অঞ্চলটোৱে কৃষি কৰ্মৰ ওপৰত বহুতো গৱেষকে গৱেষণা কৰাৰ লগতে অসমৰ বিভিন্ন স্হানৰ পৰা বহু লোক অঞ্চলটোৰ কৃষি সৌন্দৰ্য উপভোগ কৰিবলৈ আহে ।
লগতে পঢ়কঃমাহিলী ৫০০ টকাকৈ দিয়া হ’ব ই-শ্ৰম কাৰ্ড (e-Shram Card) ৰ শ্ৰমিকসকলক
দ্বিতীয় অঞ্চলটো হ’ল চাংসাৰিৰ ওচৰৰ আঠিয়াবৈ বনমোঝা গাওঁ । এই গাওখনে এইবেলি সংবাদ শিৰোনাম দখল কৰিবলৈ সক্ষম হৈছে । শ শ বিঘা মাটিত কৰা সৰিয়হ খেতিয়ে অসমৰ মুখ্যমন্ত্ৰী হিমন্ত বিশ্ব শৰ্মাকো আকৰ্ষিত কৰিছে । আনকি মুখ্যমন্ত্ৰীয়ে বিভাগীয় বিষয়া-কৰ্মচাৰীক পঠিয়াই অঞ্চলটোৰ চোৱা চিতাৰ নিৰ্দেশ দিছে ।
তৃতীয়তে বেজেৰা উন্নয়ন খণ্ডৰ অধীনত শালমাৰা গাওঁৰ গোঁসাইদোঙা পাৰত চলা মৎস বিপ্লৱ আৰু আনুসংগিক খেতি । ১৫-২০ পুখুৰীত ( বিশাল আকাৰৰ ) কৰা মৎস উৎপাদনে অসমৰ মাছৰ অভাৱ কিছু হলেওঁ নাইকীয়া কৰিব পাৰিব । লগতে পুখুৰীৰ পাৰত কৰা কল খেতি, জলকীয়া খেতি, নেমু খেতিয়ে অনাগত দিনত যথেষ্ট ভাল ফল দিব । এই কৃষি প্ৰচেষ্টাটোৰ নাম হ’ল কামৰূপা বহুমুখী প্ৰকল্প ।
বৃহত্তৰ উত্তৰ পূৱ কামৰূপ অঞ্চলৰ আন এটা গুৰুত্বপূৰ্ণ অঞ্চল হৈছে মান্দাকাটা অঞ্চল । এই অঞ্লটোৰ এক বিস্তৃত এলেকাত গঢ়ি উঠা চাহ বাগিছাসমূহে কৃষি ক্ষেত্ৰখনলৈ বৰঙণি আগবঢ়োৱাৰ লগতে পৰ্যটকৰ আকৰ্ষিত কৰিবলৈ সৌন্দৰ্য বৰ্ধনৰ উল্লেখযোগ্য ভূমিকা পালন কৰিছে । নতুন বছৰৰ প্ৰকমুহুৰ্তত ইতিমধ্যে বিভিন্ন লোক এই ঠাইখনলৈ বনভোজ খাবলৈ আহিছে ।
অঞ্চলটোত এইদৰে গঢ়ি উঠা খেতিৰ এই নিৰৱ বিপ্লৱে অসমৰ বিভিন্ন প্ৰান্তৰ মানুহক আকৰ্ষিত কৰিছে আৰু এইবাৰ বনভোজৰ বাবে ভিভিন্ন ঠাইৰ মানুহ এই অঞ্চলবোৰলৈ আগমণ কৰিছে । অনাগত দিনত প্ৰশাসন তথা চৰকাৰে গুৰুত্ব দি এই অঞ্চলৰ বিকাশ সাধনেৰে অঞ্চলটোৰ কৃষি পৰ্যটনক অধিক গতিশীল কৰি তুলিব পৰা যাব ।
লগতে পঢ়কঃ অদ্ভূতঃ ছাগলীয়ে জন্ম দিলে মানুহৰ দৰে পোৱালি
শ্ৰী বিকাশ ডেকা
শিক্ষক, শালমাৰা