বতৰৰ ফল মৌচুমী সোৱাদযুক্ত আৰু অতি উপকাৰী৷ ফলবিধ মানৱ দেহৰ স্বাস্থ্যৰ সমান্তৰালভাৱে সৌন্দৰ্যচৰ্চালৈ মৌচমী ফলৰ আছে বহু উপকাৰী গুণাগুণ৷ মৌচুমীৰ আছে ছয়টাকৈ আকৰ্ষণীয় গুণ। সাধাৰণতে মৌচমীত ভিটামিন C, ভিটামিন A, ভিটামিন B কমপ্লেক্স, ফ্লেভোনইড, এমিন’ এচিড, কেলছিয়াম, আয়’ডিন, ফছফৰাছ, ছ’ডিয়াম, মেংগানিজ আদি কেইবাবিধো নিউন্ট্ৰিয়েন্টছ থাকে৷ ইয়াত থকা এন্টিঅক্সিডেন্ট গুণৰ বাবে ই সকলো বতৰতে উপকাৰী৷
এনেহেন সোৱাদযুক্ত বতৰৰ ফল বিধৰ খেতি কৰি শিক্ষিত নিৱনুৱা যুৱক যুৱতীৰ বাবে আদৰ্শ হৈ পৰিছে এগৰাকী যুৱক৷ তামুলপুৰ মহকুমাৰ পূৱ-কচুকাটাৰ শিঙিমাৰী চুবুৰীৰ যুৱ খেতিয়ক গৰাকী লক্ষ্যেশ্বৰ বসুমতাৰী৷ ২০০৬ চনতে নিজৰ ঘৰৰ পিছৰ প্ৰায় আঢ়ৈ বিঘা মাটিত মৌচুমী ফলৰ গছৰ পুলি স্থানীয় ব্ৰহ্ম চুবুৰীৰ পৰা সংগ্ৰহ কৰি আনি ৰোপন কৰিছিল৷ প্ৰতিপালনৰ পাছত খেতিয়ক গৰাকীৰ মৌচুমী খেতি ডৰাৰ পৰা ২০১১ চনত মৌচুমী গছৰ ফল উৎপাদন কৰিবলৈ সক্ষম হৈছিল৷ তেতিয়াৰে পৰা লক্ষ্যেশ্বৰে পিছলৈ চাব লগা হোৱা নাই৷ প্ৰতিবছৰে উৎপাদিত মৌচুমী ফলবোৰ বিক্ৰী কৰি আহিছে৷ প্ৰথম অৱস্থাত আঢ়ৈ বিঘা মাটিত মৌচুমী গছ ৰোপন কৰিছিল যদিওঁ এতিয়া যুৱক জনে পৰ্যায় ক্ৰমে প্ৰায় সাত বিঘাৰো অধিক মাটি সামৰি মৌচুমীৰ গছ ৰোপন কৰিছে৷
নিজে মৌচুমীৰ পূৰঠ বীজ ৰোপন কৰি পুলি উৎপাদন কৰিবলৈ সক্ষম হয়৷ সেই পুলিবোৰে ৰোপন কৰি আজি সাতবিঘা মাটিত প্ৰতি বিঘাত পঞ্চাশ জোপাকৈ মৌচুমীৰ গছ ৰোপন কৰাত প্ৰায় চাৰিশ জোপা মৌচুমী ফলৰ গছেৰে এখন বৃহৎ মৌচুমীৰ বাগান স্থাপন কৰিবলৈ সক্ষম হয়৷ বৰ্তমান লক্ষ্যেশ্বৰ ৰ বাগান খনত নতুন গছৰ ফল উৎপাদন আৰম্ভ হৈছে৷ তেওঁ জনোৱামতে এডাল গছত এক কুইণ্টল পৰ্যন্ত ফল ধৰিছে৷ আনকি এজোপা গছত অনুকূল পৰিবেশত মৌচুমী উৎপাদন হ’লেই এজোপা গছৰ পৰা চাৰিহাজাৰ টকা পাবলৈ সক্ষম হয়৷ এজোপা গছত খৰছ হয় মাত্ৰ চাৰিশ টকা৷
যুৱ খেতিয়ক গৰাকীয়ে প্ৰথমৱাস্থতাত উৎপাদিত মৌচমী বিক্ৰী কৰি ৭৫-৮০ হেজাৰ টকাৰ পৰা এক লাখ টকালৈকে সংগ্ৰহ কৰিবলৈ সক্ষম হয়৷ অৱশ্যে বেপাৰী সকলে বজাৰত গ্ৰাহকৰ ওচৰত ৬০,৬৫,৭০ টকা পৰ্যন্ত বিক্ৰী কৰি আহিছে৷ এইবেলি বানৰ কবলত পৰাত বাগানখনৰ পৰা মৌচুমী কম উৎপাদন হোৱাত মাত্ৰ আশীহেজাৰ মান ধন সংগ্ৰহ কৰিবলৈ সক্ষম হয়৷ এইবেলিওঁ সাত বিঘা মাটিত ৰোপন কৰা গছৰ ফল অধিক হাৰত উৎপাদন হব বুলি আশাৰে বাট চাইছে৷ এমাহ পাছতে ফল পৈনত হোৱাৰ আশা কৰিছে কৃষক জনে৷
তেওঁৰ উৎপাদিত মৌচমীৰ ফলবোৰ ঘৰৰ পৰাই ফলমূলৰ বেপাৰী সকলে কিনি নিয়াৰ উপৰিও তামুলপুৰ, কুমাৰীকাটা, নাগ্ৰীজুলি, দ্বাৰকুছি বজাৰত বিক্ৰী কৰি আহিছে৷ মৌচুমী ফলবিধৰ যথেষ্টখিনি চাহিদা বাঢ়িছে৷ সেয়ে বজাৰত প্ৰতিকিলো মৌচমীৰ দাম চল্লিছ টকা দৰত বিক্ৰী কৰিছে৷ তাৰোপৰি মৌচুমীৰ খেতিৰ সমান্তৰালভাৱে মালভোগ কলৰ খেতিও কৰি আহিছে৷ মৌচমীৰ লগতে মালভোগ কলৰ খেতি সহ বিগত বছৰ সমূহত এটা মোটা অংকৰ ধন লাভ কৰি আহিছে৷
সাত বিঘাকৈ মাটিত ৱতৰৰ সুস্বাদু ফল মৌচুমীৰ বাগান খনক লৈ যথেষ্ট আশাবাদী হৈ পৰিছে লক্ষ্যেশ্বৰ বসুমতাৰী৷ এনেদৰে উদ্যান শস্যৰ খেতিৰে সকলোৰে আদৰ্শ আৰু অনুপ্ৰেৰণাৰ প্ৰতীক হৈ পৰিছে যুৱ খেতিয়ক জন৷
লগতে পঢ়ক-ষ্ট্ৰ'ব্ৰেৰী খেতিৰে স্বাৱলম্বী ছয়গাঁৱৰ অনুপমা বড়ো, দৈনিক ২০০০ টকা উপাৰ্জন!
প্ৰেৰকঃ উৎপল ডেকা, তামুলপুৰ