সাধাৰণতে ঘৰৰ পিচফালে নাইবা ঘৰৰ কাষতে খালি হৈ থকা মাটিখিনিত শাক-পাচলিৰ বাৰীখন পতা হয়। যাতে ঘৰতে প্ৰয়োজন হোৱা শাক-পাচলিখিনি কম খৰচতে সহজতে সতেজ অৱস্হাত লাভ কৰিব পাৰি৷ শাক পাচলিৰ বাৰীৰ কাষতে উত্তৰ দিশে থকা মিটিখিনিতো কেই জোপামান ফলমূলৰ গছ ৰুইও শাক-পাচলিৰ লগতে ফলমূলখিনিও আহৰণ কৰিব পাৰি৷ এনে ধৰণৰ সোনকালে বঢ়া ফলমূলৰ গছবিলাক হ’ল অমিতা, নেমু মাটিকঠাক, কল, চজিনা ইত্যাদি৷
এনেদৰে শাক-পাচলি আৰু ফলমূলৰ গছ ৰুই পৰিয়ালৰ মানুহখিনিৰ শ্ৰমদান, জিৰণিৰ উৎসৰ লগতে আনন্দ উপভোগ কৰাৰ স্হলী সৃষ্টি কৰিব পাৰি৷ সাধাৰণতে এখন ২০০ বৰ্গ মিটাৰ বাৰীয়ে প্ৰতিদিনে ১.৫ কিলোগ্ৰাম শাক পাচলি যোগান ধৰে যি একোটা ৫ জনীয়া পৰিয়ালৰ বাবে বাবে যথেষ্ট ৷ ফলমূল বা শাক-পাচলি ৰোৱা বা সিঁচাৰ আগতে জাত নিৰ্বাচনত বিশেষ গুৰুত্ব আৰোপ কৰিব লাগে৷ নিৰ্বাচিত কৰা জাতবিলাক উৎপাদনক্ষম, নিৰোগী আৰু বিশ্বাসযোগ্য উৎসৰ হ’ব লাগে৷
নেমু গছৰ বাবে ৰুব লগীয়া ঠাইডোখৰত শাকপাচলি বাৰীৰ উত্তৰ দিশৰ যিকোনো একাষে হব লাগে৷ গছবিলাক মধ্যমীয়া আকৃতিৰ লগতে দীৰ্ঘদিনীয়া হোৱাৰ বাবে এনে কৰিলে প্ৰতিপালন কৰাত আৰু সৌন্দৰ্য্য বৃদ্ধিত সহায়ক হয়৷ ৰুৱাৰ পাছতে সঘনাই গছকেইজোপা পৰিদৰ্শণ কৰি বন বাত চিকুনাব লাগে। লগতে খৰালি সঘনে মাটিৰ জীপলৈ লক্ষ্য ৰাখি পানীৰ ব্যৱস্হা কৰিব লাগে৷ পৰাপক্ষত কীটনাশক ঔষধ প্ৰয়োগ নকৰাই ভাল আৰু যদিহে কিবা কাৰণত কৰিব লাগে তেতিয়াহ'লে পাত খোৱা পোকৰ কাৰণে মালাথিয়ন ৫০ ইচি নামৰ ঔষধ ১ মিলিলিটাৰ ১ লিটাৰ পানীত মিহলাই স্প্ৰেয়াৰেৰে গছৰ পাতৰ তলে ওপৰে স্প্ৰ কৰিব লাগে৷
শাক-পাচলিৰ বাৰীৰ কাষে কাষে ৰুৱ পাৰি অমিতা গছ। কাৰণ অমিতা গছেও অন্যান্য শাক-পাচলিসমূহৰ ক্ষতিসাধন নকৰে। তদুপৰি কল, অনৰাস আদিৰ খেতিও শাক-পাচলীৰ বাৰীৰ আশে-পাশে ৰোপন কৰিব পাৰে কৃষকসকলে।
লগতে পঢ়ক- ঘৰতে খাবলৈ আপুনিও কৰিব পাৰে এই কেইবিধ খেতি