অসমৰ কৃষকে কম সময়ত কৰিব পৰা খেতি সমূহৰ ভিতৰত আমি মাকৈ খেতিৰ নাম লব পাৰো৷ মাকৈ খেতিৰ পৰিচৰ্যাৰ খৰচ কম, চাহিদাৰ বাবে মূল্যমান বেছি, ফলত পৰম্পৰাগত ধানখেতিৰ অঞ্চলত খোপনি পুতিছে মাকৈ খেতিয়ে৷ এই সন্দৰ্ভত কৃষি উন্নয়ন বিষয়া দীপ গোস্বামীয়ে এক প্ৰৱন্ধত এইদৰে লিখিছে-
‘মাকৈ যিহেতু উদ্যোগিক ক্ষেত্ৰখনত বহুল ব্যৱহাৰ হয়, যেনে- শিশুখাদ্য কৰ্ন-ফ্লেক্স, কৰ্ন-ফ্লৰ আদিৰ প্ৰস্তুতিত; পশুখাদ্য, মাছৰ খাদ্য আদিৰ প্ৰস্তুতিত আমি ইয়াৰ বজাৰ পাবৰ কাৰণেও কোনো সমস্যা নহব৷ জনামতে অসমৰ কাৰ্বি আলং জিলাৰ খটখটীত প্ৰথম মাকৈ ভিত্তিক কৃষি উদ্যোগ গঢ় লৈ উঠে৷ পৰৱৰ্তী সময়ত খাৰুপেটীয়া, বৰপেটাৰোড আদি অঞ্চলসমুহতো মাকৈৰ সংসাধন উদ্যোগ গঢ় লৈ উঠিছে৷
বৰ্তমান মাকৈৰ চাহিদা বৃদ্ধিয়ে ইয়াৰ কৃষিভূমি সম্প্ৰসাৰণত অৰিহণা যোগাইছে৷চৰ অঞ্চলত মাকৈৰ কৃষিভূমি সম্প্ৰসাৰণ লক্ষ্যনীয়৷ পৰম্পৰাগত গ্ৰীষ্মকালিন ধানখেতিৰ বাবে প্ৰখ্যাত মৰিগাওঁ, দৰং, বৰপেটা আদি জিলাসমুহত মাকৈ খেতিয়ে ধানৰ পৰিপূৰক খেতিৰূপে স্থান পাইছে৷
উদাহৰণস্বৰূপে দৰং জিলাৰ ৰঙামাটি অঞ্চলৰ কথাই কব পাৰি৷ এই অঞ্চলৰ কৃষকে আহু আৰু শালি এই দুয়োটা ১ বিঘাৰ পৰা ৩০ বিঘালৈকে মাকৈ খেতি কৰে৷ বহু ঠাইত বানপানীৰ প্ৰাদুৰ্ভাৱৰ কাৰণে প্ৰায়েই শালিধান চপাব নোৱাৰে, কিন্তু কমদিনীয়া কাৰণে মাকৈ চপাব পাৰে৷ মাকৈ চপোৱাৰ পাছত কিছু ৰ’দত শুকুৱাই চেলাৰ মেচিন দ্বাৰা গুটিবোৰ গুচাই ৰ’দত শুকুৱাই লব লাগে আৰু দুই তিনিটা চোকা ৰ’দত দি বস্তাত ভৰাই বিক্ৰিযোগ্য কৰি তুলিব পাৰি৷
মাকৈ খেতি কৰা অঞ্চলসমুহলৈ অৰ্থনৈতিক পৰিবৰ্তন অহা চকুত পৰে৷ সকলো অঞ্চলৰে পৰিবৰ্তন প্ৰায় একেধৰণৰে৷ মাকৈ খেতিয়ে কিছু হ’লেও কৃষকৰ অৰ্থনৈতিক পৰিকাঠামো সবল কৰিছে৷ এনে সৱলতা যথেষ্ট আশাব্যঞ্জক৷ তথাপিও যেন এই খেতিটোক আৰু অধিক শক্তিশালী কৰাৰ আৱশ্যক আছে৷ আনহাতে, আমি ভাবো সৰল প্ৰযুক্তি কৌশলৰ ব্যাপক ব্যৱহাৰ মাকৈ খেতিৰ উন্নয়নত অধিক সহায়ক হব৷’
লগতে পঢ়কঃ চৰাইদেউত RKVYআৰু APART ৰ অধীনত কৰা খেতি পৰিদৰ্শন কৃষি বিভাগৰ