মুগা আৰু এৰী অসমৰ পৰম্পৰাগত শিল্প। সম্প্ৰতি এই দুই শিল্পৰ দ্বাৰা অসমে বিশ্বদৰবাৰত নিজকে চিনাকী দিবলৈ সমৰ্থ হৈছে। আজিকালি সততে এই দুই শিল্পৰ ক্ৰমাগত হ্ৰাস হোৱা বুলি অভিযোগ শুনিবলৈ পোৱা যায়। কিন্তু চৰকাৰী তথ্য অনুসৰি ২০১৫-১৬ বৰ্ষৰ পৰা ২০২০-২১ বৰ্ষলৈকে এৰী সূতা উৎপাদন ৫০৬০, ৫৬৩৭, ৬৬৬১, ৬৯১০, ৭২০৪,৬৯৩৫ মেট্ৰিক টনকৈ ক্ৰমাগত বৃদ্ধি পৰিলক্ষিত হয় । ঠিক সেইদৰে ২০১৫-১৬ বৰ্ষৰ পৰা ২০২০-২১ বৰ্ষলৈকে মুগা ক্ৰমাগত ১৬৬, ১৭০, ১৯২, ২৩৩, ২৪১, ২৩৯ মেট্ৰিক টন উৎপাদন হয় ।
এইটো কথা সত্য যে, কিছু পৰম্পৰাগত অঞ্চলত মুগা শিল্প হ্ৰাস হৈছে, কিন্তু নতুন অঞ্চলত এই শিল্প গা কৰি উঠিছে। তেনেদৰে এৰী শিল্পৰ ক্ষেত্ৰত বহুত নতুন উদ্যোগী আগবাঢ়ি অহা পৰিলক্ষিত হৈছে। কাৰ্যক্ষেত্ৰতো মুগা আৰু এৰী দুয়োটা শিল্পৰ উৎপাদিত সামগ্ৰীৰ মূল্য পূৰ্বৰ তুলনাত যথেষ্ট বৃদ্ধি পাইছে। খোলাৰ পৰা সূতা তথা বস্ত্ৰ লৈকে এই বৃদ্ধি পৰিলক্ষিত হৈছে। ইয়াৰ ওপৰিও দুয়োটা ক্ষেত্ৰত উপলব্ধ পাৰ্শ্ব উৎপাদনৰ অফুৰন্ত সম্ভাৱনা মানুহে বুজি উঠিছে।
লগতে পঢ়ক-
ব্যৱসায় আৰু উদ্যোগিক দৃষ্টিকোণেৰে এৰী পলু পালনৰ লাভালাভ
ইতিমধ্যে বহুত পৰম্পৰাগত কৃষকৰ লগতে বহু উচ্চ শিক্ষিত উদ্যোগীয়ে এই ক্ষেত্ৰত উল্লেখযোগ্য সফলতা লাভ কৰিব পাৰিছে । ব্স্ত্ৰ উৎপাদন ক্ষেত্ৰত আগবাঢ়ি অহা উদ্যোগীৰ সংখ্যা অধিক পৰিলক্ষিত হয় । কিন্তু কেঁচামাল অৰ্থাৎ খোলা উৎপাদনত সমানে গুৰুত্ব দিয়াটো সমানেই গুৰুত্বপূৰ্ণ।কিছুসংখ্যক উদ্যোগীয়ে দুয়োটা ক্ষেত্ৰত কাম কৰাটো আশাব্যঞ্জক বতৰা।
সততাৰে কাম কৰিলে মুগা আৰু এৰী শিল্পৰ দ্বাৰা দেশৰ অৰ্থনীতিত উল্লেখযোগ্য বৰঙনি আগবঢ়াব পাৰি। চীন, থাইলেণ্ড আদি দেশে বিভিন্ন পাৰ্শ্ব উৎপাদনৰ যোগেদি আলোড়ন সৃষ্টি কৰিবলৈ সক্ষম হৈছে। প্ৰসাধন সামগ্ৰীৰ পৰা আদি কৰি বিভিন্ন বৈচিত্ৰময় বস্ত্ৰ আৰু ঘৰুৱা আচবাব এৰী আৰু মুগাৰ পৰা প্ৰস্তুত কৰাৰ প্ৰচূৰ সম্ভাৱনা আছে।
লেখক : ড০ মৃদুল কুমাৰ শৰ্মা, জ্যোষ্ঠ বিজ্ঞানী, কেন্দ্ৰীয় ৰেচম ব'ৰ্ড
ফোন- ৭০০২৯২৭৬৪০
লগতে পঢ়ক-
Share your comments