পৰিত্যক্ত হৈ পৰি থকা ২৫৪ বিঘা ভূমি মুকলি কৰি বিগত বছৰৰ আগষ্ট মাহৰ পৰা মোমাই তামুলী বহুমুখী কৃষি পামৰ কাম আৰম্ভ কৰা হৈছিল। পৰিকল্পিতভাবে কৰা এই পামে বৰ্তমান কিছুদিনৰ পৰা প্ৰতি সপ্তাহত প্রায় পঞ্চাশ হেজাৰ টকাৰ কৃষিজাত বিভিন্ন উৎপাদন বিক্ৰী কৰিবলৈ সক্ষম হৈছে। পাম খনৰ ২৫৪ বিঘা ভূমিত মাটি মাহ, নেমু, ভেন্দি, তীয়হ আদিকে ধৰি ভালেমান শস্যৰ খেতি কৰা হৈছে। কোনো ধৰণৰ ৰাসায়নিক সাৰ ব্যৱহাৰ নকৰাকৈ এই পামে উৎপাদন কৰা শাক-পাচলিসমূহে স্থানীয় বজাৰ দখল কৰিবলৈ সক্ষম হৈছে। ৪৩ গৰাকী সদস্যৰে গঠিত এই সমবায় সমিতিৰ প্ৰতি গৰাকী সদস্যৰ লগতে প্ৰতিদিনে এই পামত ৪০/৫০ গৰাকী স্থানীয় মহিলা ব্যস্ত হৈ থাকে এই পামত।
কোনোবাই যদি ফচল চিঙাত ব্যস্ত হৈ থাকে, তেন্তে আন কোনোবাই নতুন খেতিৰ বাবে মাটি সাজু কৰাৰ বাবে ব্যস্ত হৈ থাকে। একালৰ এৰাবাৰীখন এতিয়া পুৱাৰ পৰাই মুখৰিত হৈ থাকে। দিচাং নৈৰ গাতে লাগি থকা পাম খনৰ লগত নিবিড়ভাবে জড়িত হৈ থকা জিতু, পৰেশ, ৰূপম, প্ৰাঞ্জল আদিকে ধৰি এমুঠি যুৱকে এতিয়া এই পামখনকে জীৱন জীৱিকাৰ সম্বল ৰূপে সাৱটি লৈছে। পামখনত চলিত বছৰত কৃষি বিভাগ আৰু কৃষি বিজ্ঞান কেন্দ্ৰই যোগান ধৰা মিলেটৰ পৰীক্ষামূলক খেতি কৰা হৈছিল। এই ফচল এতিয়া চপাব পৰা হৈছে। কেইটামান দিন পূৰ্বে সৰিয়হৰ খেতি সামৰা পামখনত এতিয়া ভোট জলকীয়া, তামোল, নেমু আদিৰ হেজাৰ হেজাৰ পুলি ৰোপণ কৰা হৈছে। ইয়াৰ উপৰি ৩০ বিঘাভূমিত অসম চৰকাৰৰ অমৃত সৰুবৰ আঁচনিৰ অধীনত বিশাল পুখুৰী খান্দি মীন পালনৰ বাবে সাজু হৈছে মোমাই তামুলী সমবায় সমিতি।
একেদৰে ব্যৱসায়িকভাৱে মুৰ্গী পালন কৰাৰ লগতে পাম খনৰ সুন্দৰ নসৈৰ্গিক পৰিবেশৰ প্ৰতি আকৰ্ষিত হোৱা আলহী ঘৰ নিৰ্মান কৰিবলৈ আগবাঢ়িছে। কৃষি আৰু গ্ৰাম্য পৰ্যটনৰ সমাহাৰ ঘটাব বিচৰা এই পাম সুচাৰুভাৱে পৰিচালনা কৰাৰ ক্ষেত্ৰৰ সমষ্টিটোৰ বিধায়ক সুশান্ত বুঢ়াগোহাঁইয়ে এক ইতিবাচক ভূমিকা লৈছে। সমবায় সমিতিখনৰ সভাপতিৰ দায়িত্ব বিধায়ক বুঢ়াগোহাঁইয়ে কান্ধ পাতি লৈছে আৰু কৃষি কৰ্মৰ জৰিয়তে বিকল্প কৰ্মসংস্থাপন সৃষ্টি কৰি এক আদৰ্শ প্ৰতিষ্ঠা কৰাৰ সংগ্ৰাম আৰম্ভ কৰিছে। বহু কেইটা দীর্ঘ ম্যাদী পৰিকল্পনা গ্ৰহণ কৰা এই পাম বৰ্তমান জিলাখনৰ এক আদৰ্শ কৃষি পামলৈ পৰিৱৰ্তিত হৈছে। পামখনত অনাগত সময়ত মুগা আৰু এৰী পালন কৰাৰ পৰিকল্পনা বাস্তৱায়িত কৰাৰ বাবে বৃহৎ পৰিমানে কেছেৰো আৰু নুনী গছ ৰোপণ কৰা হৈছে।
অতি কম সময়ৰ ভিতৰতে আশানুৰূপ ফলাফল লাভ কৰা পামখনে ইতিমধ্যে মুখ্যমন্ত্ৰীৰ পৰা ২৫ লাখ টকাৰ সাহাৰ্য লাভ কৰিছে। ইয়াৰ সমান্তৰালভাৱে জিলাখনৰ কৃষি বিভাগে পামখনক প্ৰয়োজনীয় সকলো দিহা-পৰামৰ্শ আগবঢ়াই আহিছে।
প্ৰতিবেদক- মুজাহিদ আলি, শিৱসাগৰ
লগতে পঢ়ক-