‘বিশ্ব জলবায়ু পৰিৱৰ্তনে কৃষি খণ্ডলৈ এক উল্লেখযোগ্য ভাবুকি কঢ়িয়াই আনিছে’ গুৱাহাটীৰ অসম কৃষি বিশ্ববিদ্যালয়ৰ অন্তৰ্গত উদ্যান শস্য গৱেষণা কেন্দ্ৰৰ সোণালী জয়ন্তী উদযাপনত মুখ্য অতিথি হিচাপে ভাষণ দি বৰাই কয়- ‘শেহতীয়াকৈ কৃষি বিজ্ঞানীসকলে দুটা ডাঙৰ প্ৰত্যাহ্বানৰ সন্মুখীন হৈছে, এটা পৰিৱেশ আৰু আনটো অৰ্থনৈতিক।
কিন্তু য'ত প্ৰত্যাহ্বান আছে, তাতেই আশা আছে। আৰু য'ত আশা আছে, তাত সফলতা গজি উঠে। আজিৰ কৃষি বিজ্ঞানীসকলৰ মূল কৰ্তব্য হ’ব লাগে জলবায়ু পৰিৱৰ্তনৰ দৰে পৰিস্থিতিত কৃষি খণ্ডৰ বহনক্ষমতা বজাই ৰখা আৰু কৃষকসকলক অৰ্থনৈতিকভাৱে লাভজনক কৰি তোলা।‘’ কৃষি মন্ত্ৰীগৰাকীয়ে লগতে কয় যে শেহতীয়াকৈ ৰাজ্যৰ নতুন প্ৰজন্মই কৃষি আৰু ইয়াৰ লগত জড়িত খণ্ডসমূহ গ্ৰহণ কৰি আত্মনিৰ্ভৰশীল হ’বলৈ আগবাঢ়ি আহিছে।
এই নৱপ্ৰজন্মক সকলো ধৰণৰ সহায়-সহযোগিতা আগবঢ়োৱাটো কৃষি বিজ্ঞানী আৰু কৃষি বিষয়াসকলৰ দায়িত্ব। অসমৰ দুই-এটা এফপিচিয়ে কৃষি ৰপ্তানিৰ ক্ষেত্ৰত এক নৱজাগৰণৰ সৃষ্টি কৰিছে। কৃষি মন্ত্ৰী বৰাই তেওঁৰ ভাষণত কৃষি আৰু উদ্যান শস্য বিভাগে ৰূপায়ণ কৰি থকা অসম বাজৰা মিছন, অসম ফুলৰ খেতি অভিযান আদি আঁচনিসমূহত কৃষি বিশ্ববিদ্যালয়সমূহৰ সহযোগিতা বিচাৰে।
সোণালী জয়ন্তী বৰ্ষৰ লগত সংগতি ৰাখি মন্ত্ৰী বৰাই ৰাষ্ট্ৰীয় কৃষি বিকাশ যোজনাৰ পুঁজিৰে এটা দক্ষতা বিকাশ কেন্দ্ৰ উদ্বোধন কৰাৰ লগতে ৰূপায়িত আৰ্হি ফুলৰ খেতি গাঁও আৰু অমৰ গাঁও অমৰ গৌৰৱ আঁচনিৰ অধীনত ৰাজ্যৰ বিভিন্ন জিলাৰ কৃষকসকলক ৰোপণ সামগ্ৰী আৰু কৃষি সঁজুলি বিতৰণ কৰিছে।
লগতে পঢ়ক- প্ৰধান শস্য ঘেঁহুৰ পৰিৱৰ্তে ইউক্ৰেইনে আৰম্ভ কৰিছে তৈলজাত উদ্ভিদৰ খেতি