প্ৰতি লিটাৰ গো-মূত্ৰ ৪ টকা দৰত কিনিব চৰকাৰে!

ছত্তিশগড়ত অনুষ্ঠিত হ’বলৈ গৈ আছে 'হাৰেলী' নামেৰে বিশেষ উৎসৱৰ। এই উপলক্ষে ৰাজ্যখনৰ শাসনাধিষ্ঠিত কংগ্ৰেছ চৰকাৰে লৈছে এক বিশেষ সিদ্ধান্ত। বিভাগীয় সূত্ৰই প্ৰকাশ কৰা তথ্য অনুসৰি ২৮ জুলাইত অনুষ্ঠিত হ’বলগীয়া 'হাৰেলী' উৎসৱৰ পৰা চৰকাৰে প্ৰতি লিটাৰত নিম্নতম ৪ টকা হাৰত গৰুৰ প্ৰস্ৰাৱ ক্ৰয় আৰম্ভ কৰিব।

ই গো পালনকাৰী, জৈৱিক কৃষকসকলক উপাৰ্জন বৃদ্ধি কৰাৰ লগে লগে গ্ৰাম্য অৰ্থনীতি শক্তিশালী কৰিব। মন কৰিবলগীয়া যে, গোবৰ সংগ্ৰহৰ বাবে দুবছৰ পূৰ্বে ৰাজ্যখনত চৰকাৰে 'গোধন ন্যায় যোজনা' আৰম্ভ কৰিছিল।

গো-ধন ন্যায় মিছনৰ সঞ্চালক আয়াজ তাম্বোলীয়ে জিলা সংগ্ৰাহকসকলক কৃষি আৰু পৰিৱেশৰ সৈতে সম্পৰ্কিত হাৰেলী উৎসৱ ৰ শুভাৰম্ভৰ পূৰ্বে প্ৰয়োজনীয় ব্যৱস্থা কৰিবলৈ নিৰ্দেশ দিছে বুলি তেওঁ কয়।

"প্ৰথম পৰ্যায়ত, প্ৰতিখন জিলাত দুটা স্বতন্ত্ৰ 'গৌথান' (পশুধন আশ্ৰয়) ত গৰুৰ প্ৰস্ৰাৱ সংগ্ৰহ কৰা হ'ব। গৌথান পৰিচালনা সমিতিয়ে স্থানীয় স্তৰত গৰুৰ প্ৰস্ৰাৱৰ হাৰ নিৰ্ধাৰণ কৰাৰ অধিকাৰী হ'ব। অৱশ্যে, কৃষি উন্নয়ন আৰু কৃষক কল্যাণ বিভাগে প্ৰতি লিটাৰত নিম্নতম ৪ টকাৰ হাৰৰ প্ৰস্তাৱ দিছে," তেওঁ কয়।

"সংগ্ৰাহকসকলে দুটা স্বতন্ত্ৰ গৌথান চিনাক্ত কৰিবলৈ আৰু সদস্যসকলক প্ৰশিক্ষণ প্ৰদান কৰাৰ লগতে আঁচনিখন সম্পাদন কৰাৰ বাবে স্ব-সহায়ক মহিলা (এছএইচজি) গোট বাছনি কৰিবলৈ দায়বদ্ধ হ'ব। সংগ্ৰহ কৰা গৰুৰ প্ৰস্ৰাৱ কীট নিয়ন্ত্ৰণ সামগ্ৰী আৰু প্ৰাকৃতিক তৰল সাৰ তৈয়াৰ কৰিবলৈ ব্যৱহাৰ কৰা হ'ব," বিষয়াজনে জনায়।

গোধন ন্যায় যোজনা (Godhan Naya Yojana)

ছত্তীশগড় চৰকাৰে দুবছৰত গোধন ন্যায় আচঁনিৰ অধীনত ১৫০ কোটি টকাৰ অধিক মূল্যৰ গোবৰ ক্ৰয় কৰিছে। 2020 চনৰ জুলাই মাহত হাৰেলী উৎসৱত 'গোধন ন্যায় যোজনা' জৰিয়তে ভাৰ্মিকম্পষ্ট প্ৰস্তুত কৰিবলৈ প্ৰতি কেজি গোবৰ ২ টকা দৰত ক্ৰয় কৰিছিল।

উল্লেখ্য যে বিগত দুটা বছৰত ৰাজ্য চৰকাৰে চাৰিটা SHG ৰ জৰিয়তে 20 লাখ কুইণ্টলতকৈও অধিক ভাৰ্মিকম্পষ্ট, চুপাৰ কম্পোষ্ট, আৰু চুপাৰ প্লাছ কম্পোষ্ট ক্ৰয় কৰিছে।

লগতে পঢ়ক-প্ৰধানমন্ত্ৰী কিষাণ যোজনাৰ অধীনত স্বামী আৰু পত্নীয়ে লাভ কৰিব দ্বাদশ কিস্তি!