অমিতাৰ বৈজ্ঞানিক নাম ‘Carica Papaya’ । এই ফল স্বস্হ্যৰ বাবে বৰ উপকাৰী । অমিতা ভেষজ গুণসম্পন্ন সুমিষ্ট, সোৱাদযুক্ত এবিধ ফল । ইয়াক কেচাঁ অৱস্হাত আঞ্জা, চালাড হিচাপে আৰু পকিলে ফল হিচাপে খোৱা হয় । পকা অমিতাৰ পৰা জাম-জেলি, আইচক্ৰিম, বিভিন্ন ধৰণৰ মিঠাই আদিও তৈয়াৰ কৰা হয় ।
অমিতাৰ ইংৰাজী নাম ‘Papaya’ । বিশ্বৰ বিভিন্ন দেশ যেনে স্পেইন, নৰৱে, জাৰ্মানী, চুইডেন, আয়াৰলেণ্ড, হাংগাৰি, টাৰ্কি, ইণ্ডোনেচিয়া আদি দেশত ‘Papaya’ নামেৰে জনাজাত । ফ্ৰান্সত ইয়াক Papaye বুলি কোৱা হয় । আনহাতে বাংলাত ইয়াক পেঁপে, তেলেগুত বব্বায়া, মালায়ালামত প’পয়া বুলি জনাজাত । আমাৰ অসমত অমিতাৰ আন নাম হ’ল মধু ফল, মৈথ ফল, অমৃত ফল । কাৰ্বি ভাষাত মেনচপি আৰু মেংচপি । ডিমাচাত খোপল আৰু গৈফল । টিৱাসকলে উমৰিদ আৰু উমৰিট বুলি কয় ।
শীতকালত অমিতা আপোনাৰ আহাৰৰ তালিকাত অন্তৰ্ভুক্ত কৰাৰ বহুতো উপকাৰিতা আছে । অমিতা এবিধ অধিক পুষ্টিকাৰক ফল, ই শৰীৰৰ তাপ বৃদ্ধি আৰু বাটা-কফ কাৰ্যকৰীভাৱে নিয়ন্ত্ৰিত কৰে । তাৰোপৰি শীতকালত সৃষ্টি হোৱা কোষ্ঠকাঠিন্যৰ দৰে গুৰুতৰ সমস্যা হ্ৰাস হোৱাত সহায় কৰে । অমিতাত থকা পেপাইন আৰু কাইমোপাপিন নামৰ এনজাইমবোৰে প্ৰ’টিন হজম হোৱাত সহায় কৰে ।
আয়ুৰ্বেদ অনুসৰি অমিতাই উষ্ণতাৰ গুণাগুণৰ বাবে হজম শক্তি উন্নত কৰে । কাহ আৰু চৰ্দি, ঋতুস্ৰাৱৰ বিষ ,পদাহ হ্ৰাস, ডায়েবেটিচ আদিৰ ক্ষেত্ৰতো অমিতা অতি উৎকৃষ্ট । কোৱা হয় যে পুষ্টিৰ ক্ষেত্ৰত এক মজলীয়া আকাৰৰ অমিতাত প্ৰতিদিনে প্ৰয়োজন হোৱা ভিটামিন চি-ৰ ২০০% ৰো অধিক থাকে । আপুনি যদি ৰোগ প্ৰতিৰোধ ক্ষমতা বঢ়োৱা ফল বিছাৰি আছে তেন্তে অমিতা আটাইতকৈ উত্তম । অমিতা ফলেট, মেগনেছিয়াম, ভিটামিন এ পটাছিয়াম আৰু আঁহৰ ভঁৰাল । দৈনিক অমিতা সেৱন কৰা লোকৰ হৃদৰোগৰ আশংকা কমি যায় ।
অমিতাত এণ্টি অস্কিডেণ্ট (বিটা কেৰোটিন) অধিক থাকে যিটো ছালৰ ৰোগৰ বাবে অতিকৈ উপকাৰী । অমিতাত প্ৰচুৰ পৰিমাণে আঁহ থাকে, ফলস্বৰূপে কোষ্ঠকাঠিন্য থকা লোকসকলে উপকৃত হ’ব পাৰে । অমিতা গছৰ পাতবোৰ মেলেৰিয়া-প্ৰতিৰোধী গুণাগুণেৰে সমৃদ্ধ । ডেংগু জ্বৰ আৰু অন্যান্য ৰোগৰ বিৰুদ্ধে যুঁজ দিয়াটো অমিতা সৰ্বশ্ৰেষ্ঠ ঘৰুৱা প্ৰতিকাৰ । অমিতা গছৰ পৰা তৈয়াৰ কৰা ৰস বা মণ্ড কেৱল ডেংগু জ্বৰৰ লক্ষণবোৰৰ সৈতে যুঁজ দিয়াই নহয় ইয়াক নিৰাময় কৰাতো যথেষ্ট কাৰ্যকৰী ।
লগতে পঢ়কঃhttps://asomiya.krishijagran.com/health-lifestyle/skin-care-during-winter/
Share your comments