অৱশেষত সেই বিশেষ দিনটো আহিল- যিটো দিনৰ কাৰণে ইমান বছৰ উত্রাৱল হৈ আছিলোঁ | জুন মাহৰ ২৯ তাৰিখে চিনাকি কৃষক এজনে WhatsApp ত ধকধকীয়া শুভ্ৰ বৰণৰ ধূনীয়া নতুন গাড়ী এখনৰ ফটো পঠাইছে | অকল ফটো, একো লেখা নাই | গাড়ীখন Showroom ৰ পৰা উলিয়াই দিবৰ কাৰণে সাজু কৰিহে আছে | অ'ত-ত'ত প্লাষ্টিক আৰু কাগজৰ খালী পেকেট সিঁচৰতি হৈ আছে | নিজে 'মালিকী  মিজাজ'ত গাড়ীখনত আঁউজি ভঙ্গিমা দিছে | ধাৰণা কৰিব পাৰি- লাগতিয়াল accessories লগোৱাৰ কাম চলি আছে | বুজিবলৈ অকনো অসুবিধা নহ'ল,  মিকাছ মুছাহাৰীয়ে আজি গাড়ী কিনিলে |

হয়, মিকাছ মুছাহাৰী | গোসাঁইগাওঁৰ এজন সফল খেতিয়ক, এজন সফল কল খেতিয়ক | মোৰ ফালৰ পৰা সঁহাৰি দিয়া হ'ল Congrats ! Banana fruits turned into beautiful car. তেওঁৰ লগত চিনাকি বেছি দিনৰ নহয়, ল'ক ডাউনৰ সময়তহে ব্যক্তিগতভাৱে প্ৰথম যোগাযোগ হৈছিল | ইয়াৰ আগতে PM-KSY আঁচনিৰ অধীনত Drip irrigation ৰ সাঁ-সৰঞ্জাম আনুষ্ঠানিকভাৱে বিতৰণ কৰাৰ দিনা, ৩ মাৰ্চত, জাৰাগুৰিত অন্যান্য কল খেতিয়কৰ লগতে তেখেতক লগ পাইছিলোঁ |  ল'ক ডাউন আৰম্ভ হোৱাত তেখেতে সঘনাই যোগাযোগ কৰিব ধৰিলে | কাৰণ তেখেতৰ ২০০ বিঘাৰো অধিক মালভোগ কল এপ্ৰিল-মে মাহৰ ভিতৰত বিক্ৰীৰ বাবে সাজু হৈ আছিল | প্ৰায় ৬০,০০০ - ৭০,০০০ কলৰ থোক! ল'ক ডাউন চলি থাকিলে ক'ত কেনেকৈ বিক্ৰী কৰিব, তাকে লৈ দূ:চিন্তাত পৰিছিল | ইতিমধ্যে কেইটামান কলৰ থোক পকিবলৈ আৰম্ভ কৰিছিলেই | বজাৰ নাই, গাড়ী নাই, গ্ৰাহক নাই!

লগতে পঢ়ক- 

Cow-breeding : অসমৰ কৃষিখণ্ডৰ উন্নয়নত পৰম্পৰাগত গো-পালনৰ বাধা

নতুনকৈ গঠন হোৱা FPC এটাৰ লগত যোগাযোগ কৰিলোঁ | FPC টোও একেবাৰেই অনভিজ্ঞ, একো উৱাদিহ্ পোৱা নাই | বিভাগীয় মুখ্য কাৰ্যালয়েও সহায় কৰিব পৰা নাই | কি যে সমস্যা ! তাৰ মাজতে অত্যাৱশ্যকীয় সামগ্ৰীৰ পৰিবহণ তথা বিক্ৰীৰ ক্ষেত্রত চৰকাৰে ল'ক ডাউনৰ নিয়মাৱলীৰ কিছু সংশোধন ঘটাই শিথিলতা প্ৰদান কৰিলে | মহকুমা প্ৰশাসনৰ লগত যোগাযোগ কৰি কল খেতিয়ক সকলৰ জলন্ত সমস্যাক অৱগত কৰি পৰিবহণ তথা বিক্ৰীৰ বাবে অনুমতি প্ৰদান কৰিবলৈ অনুৰোধ জনোৱা হ'ল | প্ৰশাসনৰ তৰফৰ পৰা খেতিয়ক সকলৰ চিনাকি পত্র virtual মাধ্যমৰ জৰিয়তেই বিচাৰিলে | চৰকাৰৰ হুকুম -য'তেই আছা তাতেই থাকা ; ঘৰৰ পৰাই কাম কৰা !

প্ৰথমবাৰ ১৫ এপ্ৰিললৈকে Emergency Service Pass প্ৰদান কৰিলে | এইখন লৈ তেখেতে গুৱাহাটীত বাহৰ পাতি থকা বেপাৰীৰ তাত প্ৰতি খেপত ১৮০-২০০টাকৈ কলৰ থোক যোগান ধৰিবলৈ আৰম্ভ কৰিলে | গোসাঁইগাওঁৰ পৰা সন্ধিয়া ৭:০০ -৭:৩০ বজাত ৰাওনা হয় আৰু ৰাতি ২:৩০ -৩:০০ বজাত গুৱাহাটী পায় ; কলখিনি নমাই থৈ আকৌ গোসাঁইগাওঁলৈ উভতি আহে ! মাজে মাজে ধুবুৰী, গোলকগঞ্জলৈও নিছিল | পিছলৈ বজাৰখন আকৌ ঠন ধৰি উঠিলত ডাঙৰ গাড়ীৰেও কল পঠাবলৈ সক্ষম হ'ল | মাজতে আমিও তেখেতৰ বাগান চাবলৈ গ'লো | সোনকোষ নদীৰ পাৰত কলৰ বিশাল বিশাল বাগান, অপূৰ্ব দৃশ্য, প্ৰতিজোপা গছত পুৰঠ বা অৰ্ধ পুৰঠ কলৰ থোক ওলমি আছে ! দৃশ্যটো দেখি আমি (লগত সহকৰ্মী মনীন্দ্ৰ নাৰায়ণ দাস, অশোক সৰকাৰ) নিজকে সঁচাকৈ ধন্য মানিছিলোঁ !     

তেনেদৰে নিজৰ পৰিকল্পনা অনুসৰি মিকাছ মুছাহাৰীয়ে প্ৰায় গোটেইখিনি কল ৰমজান মাহৰ ভিতৰত, যিটো সময়ত কলৰ চাহিদা উৰ্ধতম হয়, বিক্ৰী কৰিবলৈ সক্ষম হ'ল | তেখেতে এইবেলি প্ৰতিথোক কল ২৪০-২৫০ টকাকৈ বিক্ৰী কৰা বুলি জনাইছে, চপোৱা আৰু পৰিবহনৰ খৰছ দ্বিতীয় পক্ষৰ | বিভিন্ন তালাচী চকীবোৰত কিছু হাৰা-শাস্তিৰ সন্মুখীনো হ'ব লগা হৈছিল, বিশেষকৈ 'বৰঙণি'ৰ পৰিমাণ মন:পুত নহ'লে বেছি সময় ৰখাই থৈছিল | ইমান দিনে শুনি আহিছিলোঁ যে পঞ্জাৱৰ খেতিয়ক সকলে বিলাসী গাড়ী চলাই ফুৰে ! সেয়া আজি স্বচক্ষে দেখিবলৈ পাই অনাবিল আনন্দ তথা সুখানুভূতি লাভ কৰিছো | অনাগত দিনবোৰত তেখেতৰ দৰে আৰু যেন অনেক সফল খেতিয়ক, অনেক মিকাছ মুছাহাৰীৰ জন্ম হয় আমি আশাবাদী।

লগতে পঢ়ক- 

থলুৱা খাদ্যক বজাৰ উপযোগী কৰি স্বাৱলম্বী গৌৰীসাগৰৰ পৰী ৰাজখোৱা