ধান খেতি নহয় তামোলৰ খেতিৰে জীৱন নিৰ্বাহ কৰি আহিছে বাক্সাৰ এটা অঞ্চলৰ জনসাধাৰণে৷ ধানৰ সলনি বিঘাই বিঘাই ৰুইছে তামোল৷ সুচনা কৰিছে বৃহত্তৰ অঞ্চলটোত এক কৃষি বিপ্লৱৰ৷ যি ফালে চাব সেইফালে মাথোন তামোল৷ বাক্সা জিলাৰ ভাৰত-ভূটান সীমান্তৰ সূৱণখাটা, নবস্তি, খৈৰাণী, উত্তৰকুছি, নিকাছি, ভূটানখুটি, দ্বাৰাগাঁওকে ধৰি এটা বৃহত্তৰ অঞ্চলত শেহতীয়াকৈ জনসাধাৰণে আৰম্ভ কৰিছে তামোলৰ খেতি৷
বৃহত্তৰ অঞ্চলটোৰ খেতি মাটি শিল, বালিৰে ভৰ্তি হৈ থকা বাবে ধান খেতি কৰিবলৈ সমস্যাৰ সম্মুখীন হয় অঞ্চলটোৰ কৃষক ৰাইজে৷ ইয়াৰোপৰি খৰচ অনুসৰি ধান খেতিৰ পৰা লাভবান নহয় কৃষকসকল৷ সেয়ে বিকল্প খেতি হিচাপে সীমান্ত অঞ্চলটোত কৃষকসকলে ধানৰ সলনি ৰুইছে তামোল৷
বিঘাই বিঘাই তামোল ৰুই সীমান্ত অঞ্চলটোত সুচনা কৰিছে এক সেউজ বিপ্লৱৰ৷ জানিব পৰা মতে প্ৰতিবিঘা তামোলৰ পৰা বছৰেকত এগৰাকী কৃষকে প্ৰায় লক্ষাধিক টকা উপাৰ্জন কৰিবলৈ সক্ষম হয়৷ কিন্তু ধান খেতিৰ পৰা কৃষকসকলে নাপায় উপযু্ক্ত লাভালাভ৷ কৃষকে সকলে এই তামেল সমূহ কেছাই বিক্ৰী কৰাৰ উপৰিও ঘৰতে চুপাৰি কৰি বিক্ৰী কৰি আহিছে৷ সম্প্ৰতি প্ৰতি কেজি তামোল চল্লিশৰ পৰা পঞ্চাশ টকা দৰত বিক্ৰী কৰি আহিছে৷
অঞ্চলটোৰ কৃষকসকলে জানিব দিয়া অনুসৰি উপযুক্ত বজাৰ নথকা বাবে ইয়াৰ কৃষকসকলে তামোলৰ উপযুক্ত দাম পাবলৈ সক্ষম হোৱা নাই৷ শেহতীয়াভাৱে হাউলীৰ পৰা অহা বেপাৰীয়ে এই অঞ্চলৰ তামোলসমূহ কিনি নিয়ে৷ কৃষকসকলে অঞ্চলটোৰ যাতায়ত ব্যৱস্থা উন্নত কৰি তোলাৰ লগতে উপযুক্ত বজাৰ সৃষ্টি কৰিবলৈ বিভাগীয় কৰ্তৃপক্ষক দাবী জনাইছে৷
লগতে পঢ়ক-Pineapple Farming: আনাৰসৰ খেতিৰে আত্মনিৰ্ভৰশীল হ'ব পাৰে কৃষকসকল, পঢ়ক সম্পূৰ্ণ তথ্য!
Share your comments