পালেং শাকৰ উপকাৰিতা আৰু খেতি কৰাৰ উপায়

শীতকালত কৰিব পৰা শাক-পাচলিৰ খেতিৰ ভিতৰত অন্যতম হৈছে পালেং শাকৰ খেতি। এই শাকবিধৰ চাহিদা গোটেই বছৰজুৰি থাকে যদিও শীতকালতেই প্ৰধানতঃ ইয়াৰ খেতি কৰা হয়। পালেং শাকত প্ৰ'টিন, কেলচিয়াম, আইৰণ, ভিটামিন এ, বি আৰু চি থাকে। পাতত ক্লৰ'ফিল আৰু লিপিড থাকে। এই লিপিডে বেক্টৰিয়া নাশ কৰে। পালেং শাকত কম পৰিমাণৰ কাৰ্ব'হাইড্ৰেটো থাকে। পাত কোমল, ডাঠ আৰু বহল হয়। সেউজীয়া পাত ৰসাল হয়। পালেং শাক সিজাই জোল কৰি, দাইল মাছৰ আঞ্জা বা কেঁচাই চাটনি কৰি খাব পাৰি।

শ্বাস-প্ৰশ্বাসজনিত ৰোগ, কাহ-কফ হৈ থাকিলে পালেং শাকৰ জোল গৰম কৰি খালে সুফল পোৱা যায়। এই জোলত অকণমান ক’লা নিমখ আৰু জালুকৰ গুড়ি দিব লাগে। এজমা ৰোগীয়ে এনেদৰে খালে সুফল পায়। পালেং শাক খালে ৰক্তস্ৰাৱ ৰোগীয়ে সুফল পায়। সেইদৰে জণ্ডিচৰ লগতে প্ৰস্ৰাৱৰ ভিন্ন ৰোগীয়েও এনেদৰে খালে সুফল পায়। দেহৰ অতিৰিক্ত চৰ্বি হ্ৰাস কৰিবলৈ পালেং শাক খালে সুফল পোৱা যায়।

শৌচ খোলোচা নহ’লে, শৌচ কমকৈ ঘনাই ঘনাই হ’লে পালেং শাকৰ জোল খাব লাগে। পালেং শাক খালে দেহৰ ৰোগ প্ৰতিৰোধ ক্ষমতা বৃদ্ধি পায়, বিশেষকৈ কৰ্কট ৰোগ প্ৰতিৰোধৰ ক্ষেত্ৰত পালেং শাক খোৱাটো বৰ প্ৰয়োজনীয়।

নিম্ন ৰক্তচাপৰ ৰোগীয়ে পালেং শাক খালে সুফল লাভ কৰে। শিশুৰ পঁয়ালগা ৰোগত পালেং শাক খালে সুফল পায়। পালেং শাকত যিহেতু যথেষ্ট পৰিমাণৰ কেলচিয়াম থাকে, সেয়েহে হাড় আৰু দাঁতৰ গঠন সৱল হয় আৰু দেহৰ বিষ নাশ হয়। তেজৰ হিম’গ্লবিন বৃদ্ধি কৰিবলৈ পালেং শাক খাব লাগে। সৌন্দৰ্য বৰ্ধনতো পালেং শাকৰ গুৰুত্ব অপৰিসীম। পালেং শাক খালে ছাল নিমজ হয়, কমনীয় গুণ বৃদ্ধি হয় আৰু ছালৰ বিভিন্ন ৰোগৰ পৰা উপশম পায়। পাথৰ থকা ৰোগীয়ে পালেং শাক পৰাপক্ষত নোখোৱাই ভাল।

পালেং শাকৰ খেতি কেনেকৈ কৰিব?

ছেপ্তেম্বৰৰ দ্বিতীয় সপ্তাহৰ পৰা আৰম্ভ কৰি ডিচেম্বৰ মাহলৈকে বীজ সিঁচিব পাৰি৷ প্ৰতি কি:গ্ৰাম বীজৰ বাবে ৩ গ্ৰাম কেপ্টান ৫০ ডব্লিও পি ঔষধেৰে বীজবোৰ শোধন কৰি লব৷ বীজবোৰ ২০ চে:মিটাৰ দূৰত্বৰ শাৰীত সিঁচিব লাগে৷ বীজবোৰ অঙ্কুৰিত হোৱাৰ ১০-১২ দিনৰ পিছত গছৰ পৰা গছৰ মাজত ৫-৭ চে:মিটাৰ দূৰত্ব ৰাখি পাতলাই দিব লাগে৷ হেক্টৰে প্ৰতি ২০ টন পামজাত সাৰ, ৮০ কি:গ্ৰাম নাইট্ৰোজেন, ৬০ কি:গ্ৰাম ফছফৰাছ সাৰ প্ৰয়োগ কৰিব লাগে৷

বীজ সিঁচাৰ পাছতে প্ৰথমবাৰ আৰু পিছত ১০-১২ দিনৰ ব্যৱধানত জলসিঞ্চনৰ ব্যৱস্হা কৰিব লাগে৷ বন-বাতবোৰ খেতিডৰাত ওলোৱাৰ ২০ দিন মানৰ ভিতৰত নিৰাই দিব লাগে৷ পাতত দাগ পৰা বেমাৰৰ বাবে বেমাৰ হোৱাৰ আগতেই ব্যৱস্হা লব লাগে৷ সেউজীয়া পালেং পাতৰ উৎপাদন প্ৰতি হেক্টৰত ৩০-১০০ কুইন্টললৈ পাব পাৰি৷

লগতে পঢ়কঃ লাভজনক আদা খেতি কৰক, শীতকালত চাহিদা বৃদ্ধি পালে লাভ কৰিব অধিক মুনাফা!