Krishi Jagran Assam
Menu Close Menu

কুমাৰীকাটাৰ ১৩ মহিলাই দেখুৱাইছে নিদৰ্শন

Wednesday, 17 July 2019 09:34 PM

  তামুলপুৰ মহকুমাৰ ২ নং দক্ষিণ কুমাৰীকাটাৰ দৰংগাপাৰত চলিছে ১৩ গৰাকী মহিলাৰ কৰ্মব্যস্ততা। অদম্য কৰ্মস্পৃহাক সাৰোগত কৰি তিনি বছৰমান পূৰ্বে আত্মসংস্থাপনৰ লক্ষ্যৰে তেওঁলোকে গাঁওখনত এটি ‘বাবা অনুকূল’ নামেৰে আত্মসহায়ক গোট গঠন কৰিছিল। তাৰ পিছত এই মহিলাসকলে তামুলপুৰ উন্নয়ন খণ্ডৰ তৰফৰপৰা বিভিন্ন সময়ত আত্মসংস্থাপনৰ প্ৰশিক্ষণ গ্ৰহণ কৰি আহিছিল।

এনেকৈ এদিন এই মহিলাসকলে তেওঁলোকৰ সপোন দিঠকত পৰিণত কৰাৰ বাবে ঘৰৰ পুৰুষসকলৰ সহযোগত কাঠফুলাৰ খেতি কৰিবলৈ আৰম্ভ কৰে। সেইমৰ্মে নিজে ধানখেৰ যোগান কৰি কাঠফুলাৰ খেতিৰ বাবে প্ৰয়োজনীয় সা-সামগ্ৰী তৈয়াৰ কৰি লয়। তাৰ পিছত মহিলাসকলে ঘৰৰ পুৰুষ সদস্যসকলৰ হতুৱাই পশ্চিমবংগৰপৰা কাঠফুলাৰ বীজ আনে।

তেনেকৈয়ে কাঠফুলাৰ খেতিৰে তেওঁলোকৰ জীৱন সংগ্ৰাম আৰম্ভ হয়। তিনিবছৰে কাঠফুলাৰ খেতি কৰি এতিয়া এই মহিলাসকলে সাফল্যৰ হাঁহি মাৰিবলৈ সক্ষম হৈছে।

মহিলা গোটটোৰ নেত্ৰী পখিলী ৰাজবংশীয়ে জানিবলৈ দিয়া মতে, টিনপাতৰ চালিৰ তলত ধানখেৰ কাটি টুকুৰা টুকুৰ কৰি প্লাষ্টিকেৰে একোটা ‘টোপা’ বনাই তেওঁলোকে তাত কাঠফুলাৰ বীজ ৰোপণ কৰে।

  শিলগুৰিৰপৰা অনা এশ গ্ৰাম বীজৰপৰা তিনি কিলোগ্ৰাম কেঁচা কাঠফুলা উৎপাদন কৰিবলৈ সক্ষম হয়। বীজৰপৰা পৈণত কাঠফুলা উৎপাদন কৰিবলৈ ২৫ দিনমানৰ প্ৰয়োজন হয়। এতিয়া এই মহিলা আত্মসহায়ক গোটটোৱে এমাহত প্ৰায় চাৰিশ কিলোগ্ৰাম কাঠফুলা উৎপাদন কৰিব পাৰে।

প্ৰতি কিলোগ্ৰাম কেঁচা কাঠফুলাৰ আজিৰ দিনত বজাৰমূল্য প্ৰতি কিলোগ্ৰামত প্ৰায় ১৬০ টকা। শুকান কাঠফুলাৰ কিলোগ্ৰামে প্ৰতি এহাজাৰ টকা। উল্লেখ্য যে তামুলপুৰ উন্নয়ন খণ্ডৰ ৰাষ্ট্ৰীয় গ্ৰাম্য জীৱিকা অভিযানৰ যোগেদি পখিলী ৰাজবংশীৰ নেতৃত্বত এই মহিলাসকলে প্ৰশিক্ষণ গ্ৰহণ কৰিছ।

আত্মসহায়ক গোটৰ সদস্যসকল হৈছে- মঞ্জু ৰায়, সোণমণি ৰাজবংশী, নৰেশ্বৰী ৰাজবংশী, নীলু ওজা, মনোমতী বৰ্মণ, মনোমতী ৰাজবংশী, চম্পা ৰায়, প্ৰমিলা বৰ্মন আৰু গীতিকা বৰ্মণ।

                                                                                                     লেখক: উৎপল ডেকা(দৈনিক অসম)

Lady farmers group set an example by cultivating mushroom

Share your comments

Krishi Jagran Assamese Magazine Subscription Online Subscription

CopyRight - 2019 Krishi Jagran Media Group. All Rights Reserved.